GenAmi 
  English
L'association de la généalogie juive 
Facebook




Exemple de texte moderne

En judéo-espagnol

par Gérard Galtier [1]

 

Comme exemple de texte moderne, nous avons repris le dépliant d'information du Musée Juif de Salonique. Ce dépliant est rédigé dans une graphie phonétique proche de celle de "Aki Yerushalayim" (sinon que "ni" est utilisé à la place de "ny"). Nous présentons ci-dessous ce texte dans l'orthographe "méditerranéenne" que nous préconisons.

El Museo judîo de Salonik

El Museo judîo de Salonik fue fondado para honorar la rica y creativa herencia sefaradî ansî como era en la civdad después del siécolo 15. Después de la horrivle expulsión d'Espanya por los reyes Ferdinando y Isabella en 1492, muchos Jidiós empeçaron a arrivar al abrigo de la civdad, trayendo con eyos la cultura del Renacimiento y las linguas del Mediterráneo del Oeste. Oficios como la tipografîa, la cartografîa, las ciencias medicales y el conocimiento de las armas de aquel tiempo, fizieron que los Jidiós de Iberia fueran de grande valor para los Otomanos. Estos emigrantes trusheron también los ensenyamentos y comentarios rabînicos ansî que los lavoros importantes de la Kabalah que provenîan de la tradición mîstica judîa de Gerona.

Muy presto, la creativitá sefaradî en Salonik (ansina se yamava estonces) suvió a su punto alto en el siécolo 16. La civdad tenîa un aire de tolerança y stabilitá economica. No fue por suerte que Salonik tomó el nombre "Madre de Israel".

La fuerça creativa de los primeros Jidiós se vidó muy presto en la fondación de 32 "kehilot" (comunitás), cada una con su sinagoga, tradiciones y costumbres speciales. Las kehilot tenîan nombres de los lugares de origin en Espanya, Portugal y Italia. En academîas juntos con estas sinagogas, los rabinos y mîsticos continuaron a ensenyar las grandes tradiciones de los Jidiós de Iberia. A lo largo de los siécolos, se fue engrandeciendo el chico cimeterio judîo de la civdad para pueder arrecivir los muchos defuntos. En 1940, existîan 500 000 tombas.

Al siécolo 19 y al empecijo del siécolo 20, las condiciones que yevaron al engrandecimiento de la comunitá judîa fueron trocadas por guerras, rebueltas y possibilitás de muevos horizontes en Evropa, Asia y Americas de parte de los Jidiós con ideas muevas y imaginación. Al mismo tiempo, después de la absorpción de Salonik en el Estado grego en 1912, se vidó el menester de adaptar la vida judîa a las demandas del nacionalismo curriente. Para agravar las muevas condiciones, un grande fuego en 1917 destruyó la mas grande parte de la mallah judîa [le quartier juif] en el coraçón de la civdad.

In 1941, la Grecha cayó a los Almanes y sus aleados, los Italianos y los Bulgaros, y el paez fue despartido en tres zonas de ocupación. Salonik basho los Nazîs, con su comunitá de algunos 49 000 Jidiós, no estava preparada para las horrores de la "Solución final". A la fin de 1945, sólo un punyado de Jidiós quedaron : 96,5 % de la comunitá judía de la civdad fue exterminada en los campos de la muerte en Polonya.

El Museo judîo de Salonik nació como una consecuença de estas complicadas circonstancias históricas. Es uno de los muchos lavores creados por la comunitá judîa de Salonik. El Museo se composa de :

  • La exposición fotográfica "Thessaloniki, Sephardic Metropolis" (odrenada por Simon Marks). Esta colección fue arrecogida por los esfuerços de la defunta Miriam Novitch del kibutz "Lohamei ha Getaot" en Israel.
  • "Memorias", el material fotográfico, religioso y folklorico de la Universitá de Bar Ilan. Es una muestra temporaria y contiene artifactos y recuerdos que apartenîan a los Jidiós que emigraron en Eretz Israel cuando aînda era debasho del mandato inglez.
  • La colección permanente que se esta studiando y documentando para ser exposada.

El Museo se topa en una de las raras fraguas judîas que se salvaron del fuego de 1917. Estando en el coraçón mismo de Salonik, esta imposante fragua onde eran un tiempo la "Banca de Atena" y los burós del jornal "L'Indépendant", es un silencioso testigo de la grande presencia judîa que antés inchîa las cayes con su lingua de Cervantes y sus golores de Sevilia y Toledo, onde de Viernes la tadre a Sabad la tadre todo era cayado para celebrar el Shabat. A parte de las colecciones, el Museo esta aparejando un centro de informaciones, rechercas y estudios con facilitás audio-visuales.

El Museo se estiende en dos pianos con muchas muestras :

En entrando, son las piedras tombales con inscripciones que se topavan en el grande cemeterio judîo al este de las murayas de la civdad. Con estas piedras hay también una seria de fotografîas que mostran el cemeterio y sus vigitadores ansî como era verso 1914.

En medio del primer piano se presenta la historia de la presencia judîa en Salonik del tresser siécolo A. Kh. fina la fin de la Segunda Guerra mundial. Esta muestra fue preparada en el kibutz "Lohamei Hagetaot" y financiada por la "Michael Marks Charitable Foundation".

La tressera muestra es emprestada y representa los resultados de un lavoro importante que se fizo en la Universitá Bar Ilan de Israel para recodrar y documentar las raîzes de los Jidiós de Salonik en Israel. La mas parte de estas personas emigraron a los medios de los anyos 30 a lo que estonces era el "Mandato de Palestina". La muestra es un importante recodro de ciertos aspectos de las vidas y memorias de Salonik en aquel tiempo. Para completar esta muestra se presentan muchos objectos de la colección del Museo Jidîo de Salonik. La cuartena muestra es sovre el holokosto asigún afectó a la comunitá judîa de Salonik entre los anyos 1941 y 1943, cuando la mayorîa de la comunitá (44 000 personas) fueron sistematicamente deportados a Auschwitz-Birgenau y a Bergen-Belsen. Fue estimado que huvo 94% de mortaldá.